Саяхан “Хэзээ нэгэн цагт Японд ажиллахаар төлөвлөж буй танд Японд амьдардаг гадаад иргэдийн оролцсон Япон улсад ажиллах талаарх илэн далангүй ярилцлага уулзалт” зохион байгуулагдлаа. Уулзалт ярилцлагын бичлэгт Хоккайдогийн Анагаах Ухааны Их Сургуулийн Дэвшилтэт Судалгааг Дэмжих Төвийн ажилтан Ито Юүко, Шизүокагийн Их Сургуулийн дэд профессор Сүзүки Тошифүми нар чиглүүлэгчээр оролцож Японд ажилладаг гадаад иргэдтэй Япон орны гадныхны сэтгэлийг татдаг зүйлс болон шийдвэрлэх шаардлагатай тулгамдсан асуудлуудын талаар илэн далангүй ярилцлага хийсэн юм.
Contents:
Бичлэгийн төгсгөл 3-р эхсэгт 1 болон 2-р хэсэгт оролцсон Японд амьдардаг 11 гадаад иргэнтэй “Ирээдүй・Хэтийн зорилгын тухай” гэсэн сэдвээр дахин ярилцсан юм.
Ито：Сайн байцгаана уу?『Японд амьдардаг гадаад иргэдийн оролцсон Япон улсад ажиллах талаарх илэн далангүй ярилцлага уулзалт』-ын 3-р хэсэгт мөн 1, 2-р хэсэгт оролцсон гадаад иргэд оролцож, Сүзүки Тошифүми багштай хамт “Ирээдүй”――Хэтийн зорилгын талаар ярилцсан юм.
Юуны өмнө та бүхэнд өдийг хүртэл Японд ажиллах явцад тань「Энэ нь жаахан хачин」「Энэ өөрчлөгдөөсэй」гэж бодогдсон зүйл байвал хэлэхгүй юу.
Тифани (Филиппин)：Японд хүмүүс илүү цагаар их ажилладаг, уулзалт ч байнга хийдэг, гэхдээ илүү үр бүтээмжтэй ажиллаж болох юм шиг санагддаг. Корона намжсаны дараа ч үргэлжлүүлэн гэрээсээ ажиллаж, уян хатан ажлын цагийн системийг нэвтрүүлэх зэргээр илүү уян хатнаар ажил, амьдралын балансыг нэмэгдүүлээсэй гэж хүсч байна. Эмэгтэйчүүд, хөгжлийн бэрхшээлтэй иргэдэд илүү ээлтэй, хөдөлмөрлөхөд хялбар орчныг бүрдүүлж чадах юм бол Японы компаниудад хүмүүс илүү татагдана гэж боддог.
Лаавли (Филиппин)：Японд ажлын хэнээтэй болчихсон хүмүүс олон байдаг. Япончууд төдийгүй Японд ажилладаг гадаадууд ч мөн ажлын төрөл, салбараас хамааралгүй тийм хандлагатай байдаг шүү.
Стелла (Филиппин)：Миний ажилладаг Наганод ажил оройтчихоор харих унаагүй болчих тохиолдол гардаг. Японд ирээд удаагүй гадаадуудын ихэнх нь машингүй байдаг тул хүнд байдалтай тулгардаг. Манай эх орон Филиппинд бол хувийн Жийпнэй (дундын такси) өдөржин явдаг болохоор их амар байдаг л даа …….
Эн (Вьетнам)：Хүмүүсийн хэлдгээр “Хамт ууж дотносох” гэдэг хачин шүү дээ. Ажлын харилцаандаа хувийн амьдралаа хутгана гэдэг ойлгоход бэрх. Бид нар ч гэсэн томоохон арга хэмжээ, баяр тэмдэглэх үеэр бүгдээрээ хөгжилддөг ч гэсэн тэр нь 7 хоног болгон үргэлжилнэ гэхээр…….
Сүзүки：Японд чин сэтгэлээсээ ярилцах боломж гэдэг утгаар “Хамт ууж дотносох”-ыг нилээн чухалчилдаг ч “Ажлын арга барил”-аас гадна “Хувийн цаг”-аа их чухалчилдаг гадаад иргэдийн хувьд бол дасахад хүнд ч байж магадгүй юм. Бодоод үзсэн чинь би ч, Ито багш ч ажлын хэнээтэй талдаа байж мэднэ.
Лин (Вьетнам)：「Хачин」биш ч, крантны усыг түүхийгээр нь ууж болдогт их гайхсан шүү. Вьетнамд бол буцалгахгүй л бол ууж болдоггүй болохоор.
Хоай (Вьетнам)：Японд автомат машин маш их байдаг. Зөвхөн уух юмных биш олон төрлийнх байдагт нь их гайхсан.
Ито：Төрсөн цагаасаа Японд амьдарч байгаа бол анзаарахгүй, харин гадны хүмүүсийн нүдээр харахаар өвөрмөц соёлтой санагддаг байх нь. Тэгвэл та бүхний ирээдүй хэтийн зорилгын талаар асуумаар байна. Та бүхэн Японд үргэжлүүлэн ажилламаар байна уу, эсвэл нутагтаа очоод Японд хуримтлуулсан туршлага, мэдлэг чадвараа ашиглан ажиллаж хөдөлмөрлөхийг хүсдэг үү, аль нь вэ?
Агүн (Индонези)：Би Японд маш их дуртай, гэхдээ Японд сурсан зүйлээ ашиглаад Индонезид хариад өөрийн гэсэн компани байгуулмаар байна. Японд гадаадуудад аяллын хөтөч хийдэг байсан болохоор нутагтаа хариад аяллын компани байгуулна гэж боддог. Бас Японд гадаад иргэдийг ур чадварын дадлагажигчаар хүлээж авдаг систем байдаг болохоор Японд ирэхээр бэлдэн суралцаж буй хүмүүсийг илгээдэг байгууллага ирээдүйтэй санагддаг. Баяжих нь дамжиггүй（инээв）.
Аюү (Индонези)：Бич гэсэн хэзээ нэгэн цагт Индонези руу харих бодолтой байгаа. Япон хэлний багш юм уу орчуулга хийж чаддаг аяллын хөтөч болмоор байна.
Тири (Шриланк)：Би бол Японд амьдрахаар шийдсэн. Үүний нэг шалтгаан нь 4 сарын өмнөөс хийж эхэлсэн ажил маань сонирхолтой учраас. Урьд нь 4 жил орчим аялал жуулчлалтай холбоотой ажил хийж байсан боловч Шинэ төрлийн коронавирусын улмаас ажил маань завсарлаад карьерын хувьд бүр зогсонгий байдалд орчихсон. Тиймээс энэ хэвээрээ байж болохгүй нь гэж бодоод өөр ажил хайсан ч өмнөх туршлагаа ашиглаад хийчих ажил олдоогүй. Тэгээд эрс шийдээд огт өөр салбарын ажилд хүчээ сорин, одоо гадаад худалдааны чиглэлийн ажил хийж байгаа. Бараг л тэгээс нь эхэлсэн, өөрийгөө сорьсон ажил ч ажлын маань Япон хүмүүс үргэлж надад тусалдаг учраас цаашид аль болох удаан ажилламар байна.
Ито：Коронагийн хүнд үетэй тулгарсан ч шинэ зам мөрийг гарган замнаж буй та бүхний эрч хүчийг биширч байна. Шантралгүйгээр карьераа өсгөхөөр зорьж буйг тань хараад Японд ажиллахыг хүсдэг хүмүүс их урам зориг авч байгаа байх.
Ашини (Шриланк)：Би Шриланкад буцаж очоод настны асрамжийн газар байгуулж аав ээжтэйгээ хамт амьдарна гэж боддог.
Ситүмини (Шриланк)：Би бол асаргаагаар үргэжлүүлэн суралцаж Японд цаашид ч ажиллахыг хүсдэг. Япон маш аюулгүй, амьдрахад сайхан, өндөр хөгжилтэй орон болохоор.
Сүзүки：Орон орны иргэдийг асаргааны салбарт ажиллавал их баярлана.
Ито：Үүгээр 3 хэсэгт хуваан хүргэсэн『Японд амьдардаг гадаад иргэдийн оролцсон Япон улсад ажиллах талаарх илэн далангүй ярилцлага уулзалт』маань өндөрлөх цаг боллоо. Эцэст нь Сүзүки багшийг дүгнэж үг хэлэхийг хүсье.
Сүзүки：Та бүхэнд их баярлалаа. Ажлын агуулгаас илүү “Ажлын арга барил”-ын талаар их ярьсан нь сонирхолтой байлаа. “Амьдрал ахуй”-н талаар хамтатган ярьсан нь ч бас онцлогтой байсан болов уу гэж бодож байна.
Зарим нь хэзээ нэгэн цагт эх нутагтаа харих бодолтой явдаг юм байна. Зүгээр нэг ажиллах газраа өөрчлөх гэсэн сэтгэхүйгээр биш, Японд олж авсан ур чадвараа эх орондоо дамжуулж нэвтрүүлэх “Гүүр” болох гэсэн ажил хөдөлмөрийн зорилготой байгаад нь их сэтгэл догдолж байна.
Ито：Би ч бас та бүхний олон хүмүүстэй харилцаж үнэхээр баяр хөөртэйгээр ажиллаж хөдөлмөрлөж байгааг сонсоод баяртай байна. Цаашид ч бас гадаад хүмүүстэй хамт ажиллаж, Японы ирээдүй хойчийн талаар тунгаан бодох болно.
Уг нийтлэлээр ярилцлага уулзалтын бичлэгээс зөвхөн зарим сэдвийг танилцуулж буй билээ. Бичлэгт Японы өвөрмөц соёлын талаар Японд ажиллаж амьдардаг гадаад хүмүүс илүү гүнзгий ярилцсан яриа олон бий. Дараахаас бичлэгийг бүрэн эхээр нь хүлээн авч үзнэ үү.
