ម្ហូបជប៉ុនដែល”ខ្ញុំ”ជាអ្នកធ្វើការនៅប្រទេសជប៉ុនចូលចិត្ត

ម្ហូបតំណាងម្ហូបជប៉ុន! ស៊ូស៊ី

ម្ហូបជប៉ុនដែលកញ្ញា Pornpanitta Torpithakpong មកពីប្រទេសថៃចូលចិត្តគឺស៊ូស៊ី។ កញ្ញា Ayu មកពីប្រទេសឥណ្ឌូនេស៊ីក៏ចូលចិត្តស៊ូស៊ីដែរ។ អាហារដែលឈ្មោះ Khögjilt Otgongerel មកពីប្រទេសម៉ុងហ្គោលចូលចិត្តគឺសាស៊ីមី។ សាស៊ីមីគឺជាអាហារដែលគេយកត្រីសមុទ្រស្រស់ៗមកហាន់ស្ដើងៗ ហើយហូបឆៅដោយជ្រលក់ទឹកស៊ីអ៊ីវស្យូយឹ។ វាត្រូវបានគេតម្រៀបឱ្យមើលឃើញស្អាត ដែលខ្ញុំគិតថាវាបង្ហាញពីសិល្បៈបែបជប៉ុន។ ស៊ូស៊ីគឺជាម្ហូបដែលគេហូបសាស៊ីមីជាមួយដុំបាយមានជាតិទឹកខ្មេះ ដែលបច្ចុប្បន្ននេះវារីករាលដាលជុំវិញពិភពលោក។ វាមានប្រភេទជាច្រើនដូចជា “Nigirizushi (ស៊ូស៊ីពូត)””Makizushi (ស៊ូស៊ីមូរ)””Chirashizushi (ស៊ូស៊ីរោយគ្រឿងពីលើ)”” Oshizushi (ស៊ូស៊ីសង្កត់)”។ល។ មានហាងលក់ស៊ូស៊ីខ្លះប្រើប្រព័ន្ធ”Kaitenzushi(ស៊ូស៊ីវិល)”ដែលជាប្រព័ន្ធដឹកស៊ូស៊ីដោយខ្សែក្រវ៉ាត់បញ្ជូនស្វ័យប្រវត្តិ។ គេអាចហូបស៊ូស៊ីនៅហាងលក់ស៊ូស៊ីថ្លៃៗបាន ហើយក៏អាចរកទិញបានយ៉ាងងាយស្រួលនៅផ្សារទំនើប ឬផ្សារម៉ាតជាដើមផងដែរ។

 

បាយស្រូបជប៉ុនដែលមានច្រើនបែប

កញ្ញា LOVELY ESTORGIO ដែលមកពីប្រទេសហ្វីលីពីននិយាយថា៖ ”ខ្ញុំចូលចិត្តどんぶり(បាយស្រូប)”។ វាគឺជាអាហារដែលគេធ្វើដោយដាក់បាយក្នុងចានគោម ហើយបន្តុបគ្រឿងម្ហូបពីលើ។ នៅប្រទេសជប៉ុនមានអាហារបាយស្រូបច្រើនប្រភេទដូចជា កាត្សឹដុង តេនដុង ហ្គ្យឺដុង អុយ៉ាកុដុង កៃសេនដុង។ល។ គេហៅឈ្មោះអាហារបាយស្រូបដោយដាក់ពាក្យ ” 〇〇ដុង” នៅពីក្រោយដូចជា ”ហ្គ្យឺដុង” ”កាត្សឹដុង” ជាដើម។

ហ្គ្យឺដុងគឺជាប្រភេទបាយស្រូបដែលគេយកសាច់គោមកហាន់ជាបន្ទះស្ដើងៗ ឆាជាមួយខ្ទឹមបារាំង រួចដាំស្ងោរជាមួយទឹកស៊ុបរសជាតិផ្អែម និងហឹរ ហើយស្រូបពីលើបាយ។ កាត្សឹដុងគឺជាបាយស្រូបដែលគេយក សាច់ជូ្រកបំពងម្សៅ និងខ្ទឹមបារាំងទៅដាំស្ងោរជាមួយទឹកស៊ុប គោះស៊ុតស្រោបពីលើ ហើយយកទៅស្រូបពីលើបាយ។ អុយ៉ាកុដុងគឺជាបាយស្រូបដែលគេយក សាច់មាន់ និងខ្ទឹមវែង ឬខ្ទឹមបារាំងទៅដាំស្ងោរជាមួយទឹកស៊ុប គោះស៊ុតស្រោបពីលើ ហើយយកទៅស្រូបពីលើបាយ។ ដោយសារគេប្រើសាច់មាន់ និងស៊ុតមាន់ ទើបគេហៅឈ្មោះវាថា”អុយ៉ាកុដុង(ម្ដាយនិងកូន)”។ នៅប្រទេសជប៉ុនមានហាងមួយចំនួនដែលមានប្រជាប្រិយភាព និងមានច្រើនសាខាលក់ ហ្គ្យឺដុង តេនដុង កាត្សឹដុងជាដើមដែលមានចំណុះច្រើន ងាយចូលហូប។

 

 

 

មីឆាជប៉ុនមានរស់ជាតិដូចម្ហូបនៅស្រុក

កញ្ញា MARIE STELLA VI S.MORENO ដែលមកពីប្រទេសហ្វីលីពីនបានប្រាប់យើងថា៖ ”អាហារជប៉ុនដែលខ្ញុំហូបដំបូងគេនៅប្រទេសជប៉ុនគឺតាកុយ៉ាគី(នំគ្រក់ជប៉ុន)។ ហេតុដូច្នេះហើយខ្ញុំចូលចិត្តតាកុយ៉ាគី។ ហើយខ្ញុំក៏ចូលចិត្តយ៉ាគីសុបា(មីឆាជប៉ុន)ដែរ។ ម្ហូបមីឆាជប៉ុនមានរបៀបធ្វើស្រដៀងគ្នានឹងម្ហូបមីឆា ” Pancit” របស់ប្រទេសខ្ញុំ ហើយដោយសារខ្ញុំចូលចិត្ត Pancit ទើបខ្ញុំចូលចិត្តមីឆាជប៉ុន។”

 

សូមសាកល្បងធ្វើបាយជាមួយការីជប៉ុន

កញ្ញា TRAN THI THU HOAI និងកញ្ញា NGUYEN THI THUY LINH ដែលមកពីប្រទេសវៀតណាមចូលចិត្តហូបបាយជាមួយការីជប៉ុនជាងគេក្នុងចំណោមម្ហូបជប៉ុន។ ការីជប៉ុនខុសពីការីឥណ្ឌា និងការីថៃ លក្ខណៈពិសេសរបស់វាគឺគេប្រើម្សៅមីលាយធ្វើឱ្យវាមានសភាពខាប់ ហើយគេហូបដោយយកទៅស្រូបពីលើបាយដែលគេហៅថា ” បាយជាមួយការីជប៉ុន”។ ទោះយ៉ាងណាបច្ចុប្បន្ននេះគេអាចហូបការីដែលមានប្រភពមកពីប្រទេសផ្សេងៗដូចជាការីឥណ្ឌា ការីថៃជាដើមបាន។ ប្រសិនបើគេប្រើដុំការីដែលមានលក់ស្រាប់គេអាចធ្វើការីជប៉ុនបានដោយងាយ អ្នកអាចសាកល្បងធ្វើមើលបាន។ ម្យ៉ាងទៀតក៏មានផលិតផលវេចខ្ចប់ស្រាប់ជាច្រើនដែលមានលក់នៅផ្សារទំនើប ផ្សារម៉ាតជាដើមផងដែរ ដែលអ្នកអាចប្រើប្រាស់បាននៅពេលរវល់ ឬចង់ហូបអាហារដោយងាយៗជាដើម៕