ဂျပန်နိုင်ငံတွင် ပြုစုစောင့်ရှောက်ရေးဝန်ထမ်းအတွေ့အကြုံရှိသူများမှ အတွေ့အကြုံများအကြောင်းပြောပြပေးခြင်းနှင့် အကြံဉာဏ်ပေးခြင်း

ပြုစုစောင့်ရှောက်ရေးဝန်ထမ်းအဖြစ် အလုပ်လုပ်ကြည့်ပြီး စိတ်ထဲတွင်အထင်ကျန်ဆုံး အဖြစ်အပျက်က?

ပြုစုစောင့်ရှောက်ခြင်းအလုပ်အကိုင်သည် သက်ကြီးရွယ်အိုများနှင့် မသန်စွမ်းသူများ၏ နေ့စဉ် နေထိုင်စားသောက်မှုအား ဖေးမကူညီပေးရသည့် တာဝန်ယူမှုတာဝန်ခံမှုရှိသည့် အလွန်ပင် အရေးပါလှသောအလုပ်အကိုင်ဖြစ်ပါသည်။ ထိုကဲ့သို့သောအနေအထားတွင်ပင် စောင့်ရှောက်ခံ ဘိုးဘွားများနှင့်စကားပြောဆိုဆက်ခံခြင်း၊ ဂေဟာတွင်းအခမ်းအနားများစသည်တို့ဖြင့် အမှတ်တရ များစွာကို ဖန်တီးနိုင်ပါသေးသည်။

ဂျပန်နိုင်ငံတွင် ပြုစု‌စောင့်ရှောက်ရေးဝန်ထမ်းအဖြစ် အလုပ်လုပ်ကိုင်သောအခါ မည်ကဲ့သို့သော အမှတ်တရများကို ဖန်တီးနိုင်ပါမည်လဲ။ ပထမဦးစွာ မှတ်ဥာဏ်ထဲတွင်ထင်ကျန်နေမည့် ပျော်ရွှင်ဖွယ် အချိန်များနှင့်ပတ်သက်၍ ပြောပြပေးခဲ့ပါသည်။

・“စိတ်ထဲမှာထင်ကျန်ပြီးပျော်ရွှင်ခဲ့ရတဲ့အချိန်ဟာ မွန်းလွဲပိုင်းအဆာပြေကျွေးမွေးတဲ့အချိန်ပါပဲ။ အဲဒီအချိန်မှာ ဂေဟာကစောင့်ရှောက်ခံဘိုးဘွားတွေဟာ ခန်းမကြီးထဲမှာစုဝေးကြပြီး အဆာပြေမုန့် စားသောက်ကြရင်း ပြုစုစောင့်ရှောက်ရေးဝန်ထမ်းတွေနှင့် စကားပြောလိုက်၊ သီချင်းဆိုလိုက်၊ ဂိမ်းကစားလိုက်လုပ်ပါတယ်။ ဘိုးဘွားတွေအားလုံးရယ်မောပျော်ရွှင်နေရင် ကျွန်တော်လည်း အရမ်း ဝမ်းသာခဲ့ရပါတယ်။ ဒါ့အပြင် အလုပ်များတဲ့ပြုစုစောင့်ရှောက်ရေးဝန်ထမ်းတွေလည်း ဒီလိုအချိန်မှာ စိတ်လက်ပေါ့ပါးတဲ့အချိန်ကို ဖြတ်သန်းနိုင်ပါတယ်” (ဖိလစ်ပိုင်မှ မစ္စတာ အဲလ်ဘတ် ဖာနန်ဒက်ဇ် – အိုခယာမစီရင်စုဂေဟာ)

・“ဂေဟာရဲ့အခမ်းအနားတစ်ခုမှာ ဗီယက်နမ် ဖို ခေါက်ဆွဲချက်ပြီး ရောင်းခဲ့တယ်။ အရမ်း လူကြိုက်များပြီး အချိန်တစ်နာရီလောက်နှင့် ရောင်းကုန်သွားခဲ့တယ်။ ဂေဟာကဘိုးဘွားတွေနှင့် မိသားစုဝင်တွေက “အရမ်းအရသာရှိတယ်” လို့ပြောကြတဲ့အတွက် အတိုင်းမသိဝမ်းသာမိပြီး ခုထိမှတ်မိနေတယ်။ နောက်ပြီး ဘိုးဘွားတွေ၊ ဝန်ထမ်းတွေအားလုံးနှင့်အတူတူ အိုဘွန်းအက,ကခဲ့ကြတာကိုလည်း ကောင်းကောင်း မှတ်မိနေပါသေးတယ်။ ပထမဦးဆုံးအကြိမ် ကတာဆိုတော့ သိပ်ပြီးကျွမ်းကျွမ်းကျင်ကျင်မကတတ်ခဲ့သေးပေမယ့် အရမ်းပျော်ရွှင်ခဲ့ရတယ်” (ဗီယက်နမ်မှ မစ္စ ဟုန်သီငုပ်အန်း ဟျောဂိုးစီရင်စု ပြုစုစောင့်ရှောက်ရေးဂေဟာ)

ထို့နောက်မှာ‌တော့ ဂျပန်နိုင်ငံတွင်ပထမဦးဆုံးအနေဖြင့် ပြုစုစောင့်ရှောက်ရေးအလုပ်ကိုလုပ်ကိုင်ပြီး အံ့အားသင့်မိခဲ့သောအရာတွေကိုလည်း ပြောပြပေးခဲ့ပါသေးသည်။

・“ညဆိုင်းဆင်းနေတဲ့အချိန် ညသန်းခေါင်ကြီး ဂေဟာထဲမှာဟိုဟိုဒီဒီလျှောက်သွားနေတဲ့ ဘိုးဘွားလည်းရှိတာကြောင့် စ,စချင်းက အံ့ဩသွားခဲ့တယ်” (ဖိလစ်ပိုင်မှ မစ္စတာ အဲလ်ဘတ် ဖာနန်ဒက်ဇ် – အိုခယာမစီရင်စု ဂေဟာ)

・“ပြုစုစောင့်ရှောက်ရေးဝန်ထမ်းဖြစ်ပြီး အံ့အားသင့်မိတာက ရေချိုးရာတွင်ပြုစုစောင့်ရှောက်ခြင်းပဲ ဖြစ်ပါတယ်။ အစားအသောက်ကျွေးမွေးခြင်းနှင့် ဆီးဝမ်းသွားခြင်း၊ ရွေ့လျားခြင်း၊ ဘီးတပ်ကုလားထိုင် အသုံးပြုခြင်းစတဲ့ ပြုစုစောင့်ရှောက်ခြင်းတွေကတော့ ထင်ထားခဲ့တဲ့အတိုင်းဆိုပေမယ့် ဂျပန်မှာက ရေချိုးရာမှာလည်းပြုစုစောင့်ရှောက်ပေးရပါတယ်” (အင်ဒိုနီးရှားမှ မစ္စ ရစ္စဝန်တီ)

・“အံပုံ(သွားတု)ပါ။ ဂျပန်နိုင်ငံမှာ သွားတုတပ်တဲ့သက်ကြီးရွယ်အိုတွေရှိပါတယ်။ ကျွန်မတို့နိုင်ငံမှာ သွားတုတပ်တာကို သိပ်ပြီးမတွေ့ခဲ့ရတော့ ရုတ်တရတ်ပါးစပ်ထဲကနေ သွားတွေထွက်လာတဲ့အချိန်မှာ အံ့ဩသွားခဲ့တယ်” (ဗီယက်နမ်မှ မစ္စ ဟုန်သီငုပ်အန်း)

 

ဂျပန်နိုင်ငံတွင် ပြုစုစောင့်ရှောက်ရေးဝန်ထမ်းအဖြစ် အလုပ်လုပ်ကိုင်ခြင်းမှ ခံစားခဲ့ရသည့် မိမိ၏ ဖွံ့ဖြိုးရင့်ကျက်လာမှု

သက်ကြီးရွယ်အိုများနှင့်မသန်စွမ်းသူများအား ဖေးမကူညီခြင်းအားဖြင့် အဖြစ်အပျက်များအား စဉ်းစားတွေးခေါ်ပုံနှင့် သက်ကြီးရွယ်အိုများနှင့်ထိတွေ့ဆက်ဆံပုံမှာ အပြောင်းအလဲများထွက်ပေါ် လာခဲ့ကြသည်ဟုဆိုပါသည်။ ထို့အပြင် ဂျပန်နိုင်ငံတွင်သင်ယူခဲ့ရသော ပြုစုစောင့်ရှောက်ခြင်း စွမ်းရည်များကို မိခင်နိုင်ငံပြန်ပြီးနောက်ပိုင်းတွင် လက်တွေ့အသုံးချနေကြသူများလည်းရှိပါသည်။ မိမိရှင်သန်ကြီးပြင်းခဲ့သောနေရာဒေသနှင့် ကွဲပြားသောဝန်းကျင်တွင် သင်ယူရသည့်ဘာသာစကား စွမ်းရည်များနှင့် ပြုစုစောင့်ရှောက်မှုဆိုင်ရာလုပ်ငန်းအတွေ့အကြုံများသည် နောက်ပိုင်းအလုပ်နှင့် လူမှုဘဝတွင် အမျိုးမျိုးသောအကျိုးသက်ရောက်မှုများ ပေးအပ်နေသည်ဟုဆိုကြပါသည်။ ဤသို့ဆိုလျှင် ဂျပန်နိုင်ငံ၌ ပြုစုစောင့်ရှောက်ရေးဝန်ထမ်းအတွေ့အကြုံရှိသောသူများ၏ မှတ်ချက် ရေးသားမှုကို ကြည့်ကြည့်လိုက်ကြပါစို့။

・“သက်ကြီးရွယ်အိုပဲဖြစ်စေ မသန်စွမ်းသူပဲဖြစ်စေ အဲဒီလူကို မလေးမစားလုပ်လို့မရပါဘူး။ အစခပ်သိမ်းဖေးမကူညီတာမျိုးမဟုတ်ဘဲ တတ်နိုင်သလောက် ကိုယ့်ကိစ္စကိုကိုယ့်ဘာသာ လုပ်နိုင်အောင် ပံ့ပိုးကူညီပေးခြင်းရဲ့အရေးကြီးမှုကို သင်ယူခဲ့ရပါတယ်”

・“အဘွားက လေဖြတ်ထားပြီးကိုယ်တစ်ခြမ်းသေသွားတဲ့အတွက် ပြုစုစောင့်ရှောက်ဖို့ လိုအပ်လာခဲ့ပါတယ်။ အဲဒီအချိန် ဂျပန်မှာသင်ယူခဲ့ရတဲ့ ပြုစုစောင့်ရှောက်ခြင်းနည်းလမ်းများကို အမျိုးမိသားစုများထံ သင်ပေးနိုင်ခဲ့ပါတယ်”

・“မှတ်ဉာဏ်ချို့ယွင်းမှုရောဂါ (Dementia)ဖြစ်ခဲ့ရတဲ့ ကျွန်မရဲ့အဘွားကို ပြုစုစောင့်ရှောက်ပေးနိုင်ခဲ့ ပါတယ်။ ဂျပန်မှာသင်ယူခဲ့ရတာတွေအားလုံးက အသုံးတည့်ခဲ့ပါတယ်။ အထူးသဖြင့် ရေချိုးရာတွင် ပြုစုစောင့်ရှောက်ပေးခြင်း၊ စားသောက်ရာတွင်ပြုစုစောင့်ရှောက်ပေးခြင်းနှင့် သေးခံဒိုင်ပါလဲလှယ် ပေးခြင်းစသည်တို့ဖြစ်ပါတယ်”

・“ပြောဆိုဆက်ဆံရေးရဲ့အရေးပါမှုကို သင်ယူခဲ့ရပါတယ်။ အရင်ကထက်ပိုပြီး သူများပြောတဲ့ စကားကို ကောင်းကောင်းနားထောင်တတ်လာခဲ့တယ်”

・“ဘယ်ကိုကိစ္စမျိုးတွေပဲကြုံကြုံ စိတ်အေးအေးထားပြီးဆုံးဖြတ်ချက်ချနိုင်လာခဲ့ပါတယ်။ သူတပါးကို စိတ်မဆိုးခင်မှာ ကိုယ်ကရောမှန်နေလားမှားလားဆိုတာကို စဉ်းစားတတ်လာခဲ့တယ်”

 

ယခုအချိန်မှစ၍ဂျပန်နိုင်ငံသို့သွားရောက်၍ ပြုစုစောင့်ရှောက်ရေးအလုပ် လုပ်ချင်သည်ဟု စဉ်းစားနေသူများသို့ ပြုစုစောင့်ရှောက်ရေးအတွေ့အကြုံရှိသူထံမှ အကြံဉာဏ်များ

ရင်းနှီးကျွမ်းဝင်မှုမရှိသော ဝန်းကျင်သစ်သို့သွားပြီး ကျင့်သားမရသေးသော ဘာသာစကားဖြင့် ပထမဆုံး ပြုစုစောင့်ရှောက်ခြင်းအလုပ်ကို လုပ်ရမည်ဆိုသည့်အတွက် နေ့စဉ်နေ့တိုင်းဟာ စိန်ခေါ်မှုများနှင့်ပြည့်နှက်နေပါလိမ့်မည်။ မိသားစုနှင့်ခွဲနေရလို့ အိမ်လွမ်းနာကျခြင်းမျိုး၊ အလုပ်နှင့် ဘာသာစကား၊ လေ့လာသင်ယူခြင်းစသည်တို့ကြောင့် စိတ်ဖိစီးမှုများပြားခြင်းမျိုး ရှိတတ်ပါသည်။ ထိုအခြေအနေမျိုးမှာမှ ဂျပန်အစားအစာနှင့်ယဉ်ကျေးမှုမှ ပျော်ရွှင်ဖွယ်ရာများကိုရှာဖွေ၍ ဂျပန်နိုင်ငံ၏နေထိုင်မှုဘဝကို ပျော်ရွှင်နေကြသည့်သူများလည်း များစွာရှိသည်ဟုသိရပါသည်။ ယခုအချိန်မှစတင်၍ ဂျပန်နိုင်ငံသို့သွားပြီး ပြုစုစောင့်ရှောက်ရေးအလုပ်ကိုလုပ်ကိုင်မည်ဟု စဉ်းစားနေကြသော အားလုံးသို့ အတွေ့အကြုံရှိသူဆီမှ အကြံဉာဏ်များဖြစ်ပါသည်။ ကိုးကားလေ့လာကြည့်ပါ။

・“ဂျပန်နိုင်ငံကိုမသွားခင် ဂျပန်စာကိုသေသေချာချာလေ့လာသင့်ယူထားတာကောင်းတယ်။ ဂျပန်စာ တတ်ကျွမ်းမယ်ဆိုရင် သာယာကြည်နူးဖွယ်ရာကိစ္စများ အများကြီးပဲရှိပါတယ်။ သေသေချာချာ စာလေ့လာသင်ယူပါ”

・“ဂျပန်ယဉ်ကျေးမှုနှင့် ဂျပန်စာကို လေးလေးနက်နက်နှင့်  လေ့လာသင်ယူထားတာကောင်းပါတယ်။ စ,စချင်းမှာတော့ ခက်ခဲရင်ခက်ခဲနေမလားမသိပေမယ့် ချောချောမွေ့မွေ့နှင့် စကားပြောဆို ဆက်ဆံနိုင်ပြီဆိုတာနှင့် ဂျပန်မှာနေထိုင်ရတာဟာ ဆိုသလောက်ကြီး မခက်ခဲတော့ပါဘူး”

・“အားလပ်ရက်တွေမှာ စိတ်ကြိုက်လည်ပတ်ပြီး (ရုပ်ရှင်ကြည့်တာတို့၊ ပန်းကြည့်ပွဲတော် သွားတာတို့) စိတ်ကြည်လင်လန်းဆန်းအောင်လုပ်တာကလည်း အရေးကြီးပါတယ်”

・“ဂျပန်က စည်းမျဉ်းစည်းကမ်းတွေများတဲ့နိုင်ငံဖြစ်တယ်။ ကြိုကြိုတင်တင် သတင်းအချက်အလက် ရယူတာမျိုး၊ ဂျပန်ကိုရောက်ပြီးချိန်မှာလည်း တစ်ခုပြီးတစ်ခုလေ့လာထားတာကောင်းပါတယ်”

・“အလုပ်စ,ဝင်ပြီး လအနည်းငယ်ကြာတဲ့အချိန်မှာ အိမ်လွမ်းနာကျတာဖြစ်ခဲ့ဖူးပါတယ်။ ဂျပန်ကို လာခဲ့တဲ့အကြောင်းရင်းကိုပြန်စဉ်းစားပြီး ကိုယ့်ကိုယ်ကိုပြန်အားပေးရင်းနှင့်ပဲ ဖြတ်ကျော်နိုင်ခဲ့တယ်။ စ,စချင်းမှာတော့ ခက်ခဲကောင်းခက်ခဲနိုင်ပေမယ့် ဂျပန်ရဲ့နေထိုင်မှုဘဝမှာ အသားကျသွားတဲ့အခါ ဂျပန်မှာနေထိုင်ရတာဟာ ပျော်စရာကောင်းလာခဲ့ပါတယ်။”

・“ဂျပန်မှာနေတဲ့အချိန် မိသားစုနှင့်မတွေ့နိုင်ဘူးဆိုပေမယ့်လည်း ဂျပန်မှာ ဝိုင်ဖိုင်ကောင်းတဲ့အတွက် မိသားစုနှင့် ဗီဒီရိုကောခေါ်လို့ရလို့ စိတ်အေးရပါတယ်။ နောက်ပြီး အလုပ်လုပ်ခဲ့တဲ့ဂေဟာမှာ ကိုယ့်နိုင်ငံကလူမျိုးလည်းရှိတဲ့အတွက် မိသားစုတွေလိုပဲ ရင်းရင်းနှီးနှီးဖြစ်လာခဲ့ပါတယ်”