Япон нь дэлхийн цөөхөн тооны насжилт өндөртэй нийгэм бүхий орон бөгөөд асаргааны үйлчилгээний эрэлт жил ирэх тусам нэмэгдсээр байна. Насжилт өндөрссөөр буй энэ үед Эрүүл Мэнд, Хөдөлмөр, Нийгмийн Халамжийн Яамны судалгаагаар 2026 оны эцэс гэхэд 2,400,000 орчим асаргааны ажилтан шаардлагатай гэж гарчээ. Энэ нь урьдчилсан тооцооллоор гарсан 2026 оны Японы нийт хүн амын (120 сая орчим хүн) 2%-тай тэнцэнэ. Асаргааны ажлын эрэлт цаашид ч улам нэмэгдэх тул ажилгүй болох гэсэн асуудал бараг гарахгүй болов уу.
Contents:
- Ажлын өндөр эрэлт
- Асаргааны мэргэжлийн ур чадвар эзэмшинэ
- Карьер хөгжил
- Нийгэмд хувь нэмэр оруулж буйгаа мэдэрнэ
- Гадаад асаргааны ажилчдыг хүлээн авах тогтолцоо
- Дүгнэлт
Contents:
Ажлын өндөр эрэлт
Японд асаргааны боловсон хүчний эрэлт нэн өндөр тул асаргааны ур чадвар эзэмшсэнээр тогтвортой хөдөлмөр эрхлэх боломжтой. Ялангуяа гадаад ажилчдын хувьд Японд асаргааны ажил хийх нь сэтгэл татам сонголтуудын нэг юм. Асаргааны ажилтнаар ажиллахад нас, хүйсний хязгаар үгүй. Япончууд ч залуучуудаас ахмадууд хүртэл өргөн хүрээтэйгээр ажилладаг. Японы асаргааны талбарт мэдээлэл харилцаа холбооны технологи, мэдрэгч зэрэг хамгийн сүүлийн үеийн техник тоног төхөөрөмж, асаргааны роботуудыг ашигладаг бөгөөд нас хамаарахгүйгээр ажиллах боломжтой нь давуу тал гэж хэлж болно.
Асаргааны мэргэжлийн ур чадвар эзэмшинэ
Япон улсын нийгэм насжилт өндөртэй бөгөөд асаргааны технологи, үйлчилгээ хөгжсөөр байна. Японы асаргааны талбарт ажилласнаар асаргааны өндөр техник, мэдлэгийг эзэмших боломжтой. Эдгээр ур чадварыг эзэмшсэнээр яваандаа насжилт нэмэгдэх бусад оронд ч ашиглахуйц мэргэжлийн мэдлэгтэй болох боломжтой. Асаргааны ур чадварыг эзэмшсэнээр ирээдүйд өөрийн ойр төрлийнхнийгөө асархад ч ашиглаж болно. Ялангуяа зөнөх өвчний асаргаа, нөхөн сэргээх эмчилгээ зэрэг салбар дахь мэргэжлийн мэдлэг олон улсад өндрөөр үнэлэгддэг. Ажлаараа дамжуулан дэлхийн хаана ч ашиглах боломжтой ур чадварыг эзэмших нь таны карьерт ихээхэн нөлөөлөх нь дамжиггүй.
Карьер хөгжил
Японы засгийн газраас асаргааны ажилтнуудын цалин хангамжийг сайжруулахад ихээхэн анхаарч буй бөгөөд тухайн ажилтны туршлага, мэргэжлийн зэргээс шалтгаалан цалинг нэмдэг тогтолцоотой. Иймд асаргааны ажилтнууд олон төрлийн карьерыг хөгжүүлж урам зоригтойгоор ажилладаг.
Нийгэмд хувь нэмэр оруулж буйгаа мэдэрнэ
Асаргааны ажил нь хүмүүсийн аж амьдралд шууд тус болох чухал үүрэгтэй. Асаргааны ажилд орсноор нийгэмд хувь нэмэр оруулж буйгаа мэдрэх боломжтой төдийгүй урам зоригтойгоор ажиллах боломжтой.
Гадаад асаргааны ажилчдыг хүлээн авах тогтолцоо
Японд Тусгай ур чадвар, Ур чадварын дадлага, EPA (Эдийн засгийн түншлэлийн хэлэлцээр)-т үндэслэн асаргаа, халамжийн ажилтнаар ажил горилогчдыг хүлээн авах, “Асаргаа” оршин суух зөвшөөрөл авсан гадаад иргэдийг хүлээн авах зэрэг гадаад ажилчдыг хүлээн авах тогтолцоо бүрдсэн. Ингэснээр олон тооны гадаад иргэд Японд асаргааны ур чадвар эзэмших боломжтой болдог.
Дүгнэлт
Өндөр насжилттай нийгмийг дагаад Японы асаргааны бизнес цаашид илүү чухал байр суурь эзэлнэ гэж үздэг. Японд асаргааны ур чадвар эзэмшсэнээр өндөр эрэлтээс үүдэлтэйгээр тогтвортой хөдөлмөр эрхлэх боломжтой болох, мэргэжлийн мэдлэг эзэмших, карьераа хөгжүүлэх, нийгэмд хувь нэмэр оруулж буйгаа мэдрэх зэрэг олон давуу талтай. Японд ажилладаг гадаад иргэдийн хувьд ч мөн Японы асаргааны салбарт ажилласан туршлага нь томоохон хөрөнгө болдог бөгөөд ирээдүйд карьер ахихад ч мөн давуу талтай болов уу.
